Žakelj: Kad smo se probudili igrali smo kako treba

Košarkaši Budućnost Volija savladali su danas u Beogradu Megu (92:72) u 18. kolu Admiralbet ABA lige.

Budućnost je od druge četvrtine kontrolisala utakmicu, napravila seriju 18:0, povela 34:20 i do kraja nije bilo drame.

„Kad smo se probudili, igrali smo kako treba. Nismo počeli na način na koji smo željeli, ali smo kasnije kontrolisali utakmicu. Pogotovo u skoku, imali smo 16 skokova u napadu, mislim da je onda mnogo lakše da se igra. Meč koji nije bio lak, čestitam i Megi na dobroj sezoni i želim im sve najbolje“, rekao je nakon meča trener Budućnosti Andrej Žakelj.

Već u prvoj četvrtini se desio peh – Mekinli Rajt je dobio nezgodan udarac, košarkaš Mege Iljasolu ga je nenamjerno udario laktom u lice. Amerikanac je izašao iz igre i više se nije vraćao na teren.

„Bio je u bolnici, kad sam ga vidio poslije utakmice rekao mi je da je OK. Mislim da je OK, vidjećemo sjutra kako će se osjećati, da li će biti neke reakcije, ali sada je dobro“, poručio je Žakelj.