Vučinić: 29. septembra izaberimo ljude koji će se odgovorno odnositi prema zaštiti životne sredine

Danas, kada Crna Gora slavi 33 godine od proglašenja ekološke države, suočavamo se s realnošću koja nas podsjeća koliko smo daleko od ispunjenja te vizije, saopštila je Maša Vučinić, kandidatkinja za odbornicu liste „I riječju i djelom!“ – dr Nermin Abdić.

„Umjesto čistih rijeka, šuma i zaštićenih područja, suočeni smo sa problemima divljih deponija, neodrživom urbanizacijom i urušavanjem naših prirodnih bogatstava. Naša je dužnost, kao građana ekološke države, da biramo one koji će odgovorno i s vizijom pristupiti zaštiti prirode“, rekla je Vučinić.

Prema njenim riječima, „politike koje zanemaruju zaštitu prirodnih resursa ne smiju više biti prihvatljive“.

„Samo ljudi koji razumiju da očuvanje prirodnih vrijednosti nije luksuz, već nužnost, mogu nas povesti ka održivoj budućnosti. Zato, 29. septembar je prilika da biramo pametno, da izaberemo ljude koji će se odgovorno odnositi prema našoj životnoj sredini i osigurati da Crna Gora konačno postane ono što je trebala biti – prava ekološka država“, zaključila je Vučinić.