SP: Majstorija Djuka, Australija pobijedila Tunis

Fudbaleri Australije dobili su ekipu Tunisa 1:0 u prvoj subotnjoj utakmici i u prvoj utakmici drugog kola Grupe D. Jedini strijelac je bio Mičel Djuk, ali je heroj „sokeruza“ ipak golman Metju Rajan koji je bio pod velikim udarom Tunišana u drugom poluvremenu ali je sačuvao svoju mrežu.

Jedini strijelac za „sokeruze“ je bio Mičel Djuk u 23. minutu. Do tada Australijanci nisu imali prilike, a isto je bilo i sa selekcijom Tunisa. Tek pred kraj prvog poluvremena je Tunis imao dvije prilike. Jednu je propustio Mohamed Drager, a jednu kapiten Msakni koji je šutirao pored gola.

U drugom poluvremenu je Australija bila podređen tim, Tunišani su bili ofanzivniji, imali su inicijativu, ali velike šanse nisu stvarali. Najbolje je imao kapiten Jasin Msakni u 72. minutu. Imao je dva šuta koja su oba išla u okvir gola, ali je oba odbranio kapiten Australije Met Rajan.

U 88. minutu je još jednom zaprijetio Tunis preko Vahbija Kazrija. Centaršut sa desne strane po zemlji je stigao do Kazrija koji je šutirao sa manje od deset metara ali kako udarac nije bio snažan Rajan je odbranio.

(sk)