Smjene u ruskoj vojsci: Gerasimov imenovan za novog komandanta, smijenjen Surovikin
Rusko Ministarstvo odbrane saopštilo je danas da je za novog komandanta zajedničkih snaga u specijalnoj vojnoj operaciji u Ukrajini imenovan Valerij Gerasimov, načelnik Generalštaba ruskih snaga.
Rusija je samo nekoliko mjeseci ranije imenovala Sergeja Surovikina, kojeg su ruski mediji prozvali „General Armagedon“ zbog njegove navodne nemilosrdnosti, za glavnog komandanta na bojnom polju, nakon serije ukrajinskih kontraofanziva koje su preokrenule tok sukoba.
Surovikin će ostati zamjenik Gerasimova, saopštilo je Ministarstvo odbrane.
Ministarstvo je navelo da su promjene osmišljene da povećaju efikasnost upravljanja vojnim operacijama u Ukrajini, više od 10 mjeseci od početka invazije Rusije na tu zemlju.
Gerasimov se, kao i ministar odbrane Sergej Šojgu, suočio sa oštrim kritikama proratnih vojnih blogera zbog višestrukih neuspjeha Rusije na bojnom polju i neuspjeha da obezbijedi pobjedu u invaziji za koju je Kremlj očekivao da će trajati kratko.
Ruske i ukrajinske snage vode intenzivne borbe oko grada Soledara na istoku Ukrajine, što bi, kako navodi agencija Rojters, mogla da bude prekretnica u nastojanju Moskve da zauzme cio region Donbasa.
Rusija je pokrenula invaziju na Ukrajinu 24. februara.