Petar Lazović u čudu: Izgleda da je danas krivično djelo živjeti časno, ja sam najviše hapsio Kavčane!

Ročište za kontrolu optužnice na kojem se raspravlja o opravdanosti i zakonitosti podignute optužnice koju je Specijalno državno tužilaštvo podiglo protiv okrivljenog Petra Lazovića, službenika ANB-a, Slobodana Kašćelana, Radoja Zvicera, policajca Ljuba Milovića i ostalih okrivljenih, održano je danas u Višem sudu u Podgorici. Vanraspravnim vijećem predsjedava sudija Zoran Radović.

Ročište je završeno nakon skoro pet sati, a odluka će biti donijeta u zakonskom roku, izjavila je Vijestima Marija Raković samostalna savjetnica za odnose sa javnošću.

Osim Zvicera, Milovića i Lazovića na optužnici su Radoje Živković, Nikola Spasojević, Slobodan Kašćelan, Milan Vujotić, Duško Roganović, Radovan Mujović, Radovan Pantović i Nikša Perović. Prema navodima optužnice, ova kriminalna organizacija formirana je u drugoj polovini 2020. godine i pored Crne Gore djelovala je u Južnoj Americi, Africi, Evropi i Australiji. Optuženi se terete za više teških krivičnih djela, kao što su teška ubistva, pokušaji ubistava, šverc droge, oružja i cigareta, kao i zloupotreba položaja.

Izašnjavajući se o optužnici, okrivljeni Petar Lazović, službenik ANB-a, kazao je da se osjeća osuđeno bez i jednog dokaza. Istakao je da je profesionalno radio svoj posao i da za to ima dokaze. Kazao je da je najviše hapsio pripadnike kavačkog klana, a SDT ga tereti da je član te kriminalne grupe.

“Izgleda da je danas krivično djelo živjeti časno. Već se osjećam osuđeno bez ijednog dokaza. Radio sam svoj posao u skladu sa zakonom, za šta postoje dokazi i svjedoci i starješine. Za vrijeme svog posla i rada, učestvovao sam najviše u hapšenju kavčana, više nego ijednog drugog klana. Prije lišenja slobode sam se pojavio u Centru bezbjednosti”, kazao je okrivljeni Lazović.

Dodao je da je na dan svog hapšenja ponio sva lična dokumenta kako bi ih odmah predao kolegama, naglašavajući da ni tada a ni sada nije bilo osnova za navode o bojazni od bjekstva.

“Za moje hapšenje saznao sam iz medijskog progona. Prije toga sam se pismom obratio nadležnima i SDT-u. U istražnom zatvoru sam osam mjesec , imao sam četiri temeljna pretresa, bez povlastica. Poštujem red. Izgleda da je živjeti časno krivično djelo”, kazao je Lazović u obraćanju sudu i dodao: “Sve ovo nek služi na čast onima koji stoje iza ovoga“.

Specijalno državno tužilaštvo podiglo je, početkom januara, optužnicu i protiv službenika Agencije za nacionalnu bezbjednost Petra Lazovića, Slobodana Kašćelana, Ljuba Milovića, Radoja Živkovića, Nikole Spasojevića, Milana Vujotića, Duška Roganovića, Radovana Mujovića, Radovana Pantovića i Nikše Perovića.

(Vijesti.me)