Otkriven identitet osumnjičenog za pokušaj atentata na Trampa

Objavljeno je ime osumnjičenog za pokušaj atentata na republikanskog predsjedničkog kandidata Donalda Trampa.

Njujork Tajms i Foks Njuz kanal objavili su da je riječ o 58-godišnjem Rajanu Vesli Rutu (Ryan Wesley Routh) sa Havaja, piše Rojters, prenosi Hina.

Napadač je uhapšen, a kako je juče saopštio FBI, republikanski predsjednički kandidat Donald Tramp je na sigurnom nakon pokušaja atentata kod njegovog terena za golf u Vest Palm Biču (West Palm Beach) na Floridi.

Vašington Post je objavio da je Tramp igrao golf na terenu kada se incident dogodio.

Napadač u pritvoru

Šerif okruga Palm Bič (Palm Beach) rekao je na konferenciji za medije da je napadač bio u grmlju uz golf teren kad su agenti tajne službe, koji su provjeravali teren ispred Trampa, uočili cijev puške.

Agenti su na njega zapucali, a on je odbacio automatsku pušku nalik AK-47, dva ruksaka i druge stvari te pobjegao crnim Nisanom.

Svjedok je vidio napadača i uspio fotografisati njegov automobil i registarske tablice, što je dovelo do toga da su ga šerifovi zamjenici uočili i zaustavili u susjednom okrugu.

“Trenutno je u pritvoru”, rekao je Rik Bredšou, šerif okruga Palm Bič.