Mijović: Imamo sedam dana da popravimo igru

Košarkaši Budućnost Volija pobjedom su završili učešće na ABA Superkupu – „plavi“ su pobijedili Igokeu (79:68) i osvojili treće mjesto.

Budućnost je opet odbranom slomila rivala, dok je poenterski odigrala najbolju utakmicu na turniru.

„Mislim da je važno što smo pobjedom zatvorili Superkup. U većem dijelu meča smo imali kontrolu, pokazali da vladamo situacijom u odbrani. Jedan spori ulazak u utakmicu bez ideje, bez preciznosti, 13 poena smo postigli u 1. četvrtini, a onda smo nagrađeni za odnos i pogodili neke lagane poene. Imamo sedam dana za pripremu Zadra, a onda i Lietkabelisa„, rekao je trener Budućnosti Petar Mijović.

Trener Igokee Vladimir Jovanović je rekao da je tim odigrao dobar turnir u glavnom gradu Podgorice.

„Čestitam Budućnosti na pobjedi. Mi smo došli sa idejom da u ove tri utakmice pokušamo neke stvari kroz utakmice da uvježbamo i podijelimo minute. Nije lako igrati tri utakmice u tri dana protiv ovakih protivnika. Osim Marića, koji je teže povrijeđen, ostali igrali su zdravi. Ekipa je dobro selektirana i sve će doći na svoje mjesto. Dobar turnir za nas, vidjeli smo dobre stvari i neke loše i na tome treba da radimo„, rekao je trener Igokee Vladimir Jovanović.