“Azuri” kroz produžetke do četvrtfinala

Italija je naišla na žestok otpor Austrije, ali je u 120 minuta dobila ono što je željela.

“Azuri” su slavili 2:1 na “Vembliju” i idu među osam najboljih, gdje čekaju boljeg iz meča Belgije i Portugala.

Bio je to pretežak meč za tim Roberta Manćinija, samo malo šansi na obje strane, a Austriji je u drugom poluvremenu nakon reakcije VAR-a poništen i gol Arnautovića.

U sporom ritmu se ušlo u produžetke, a tu su do izražaja došli kvalitet i svježina Italijana.

Razliku su, naime, napravili rezervisti.

Kjeza je u 95. majstorijom načeo Austriju, a u 105. se upisao i Pesina…

Tada je bilo jasno da rival nema snage da se vrati u igru u drugom produžetku, iako je Kalajdžić u 114. smanjio na 2:1.

Ranije danas je Danska deklasirala Vels 4:0 i izborila plasman u četvrtfinale prvi put od 2004. godine.

Sjutra su na programu dueli Holandija – Češka (18) i Belgija – Portugal (21).