Filkrug razdvojio Dortmund i PSŽ na Signal Iduna Parku

Fudbaleri Borusije Dortmund savladali su na domaćem terenu PSŽ (1:0) u prvom meču polufinala Lige šampiona.

Jedini gol postigao je Filkrug u 36. minutu.

PSŽ je imao veći posjed u prvom poluvremenu, ali su u tom dijelu bolje šanse imali domaći igrači.

Dortmund je prvo zaprijetio u 14. minutu Sabicer je nakon asistencije Branta šutirao, ali je Donaruma odbranio, da bi u 36. minutu Šloterbek poslao dugu loptu, a Filkrug izbjegao ofsajd zamku i zatresao mrežu.

U finišu prvog dijela je još jednu šansu imao Sabicer, ali je Donaruma odbranio.

U drugom poluvremenu su bolje šanse imali gosti, a prvi je zaprijetio Mbape, koji je pogodio stativu, da bi u nastavku akcije lopta došla do Hakimija, koji je takođe pogodio okvir gola.

Nakon toga je veliku priliku propustio Fabijan Ruiz, a onda je na drugoj strani, nakon centaršuta Sanča, Filkrug sa oko pet metara prebacio gol.

Filkrug je nakon toga još jednom bio neprecizan, a PSŽ je imao dvije šanse preko Dembelea, koji nije mogao da pronađe put do mreže.

Revanš je sedmog maja u Parizu.