Šou Dibale protiv Torina, Fiorentina nadigrala Lacio

Roma ne odustaje od plasmana u Ligu šampiona i taj cilj nije nerealan ako do kraja sezone bude imala raspoloženog i zdravog Paula Dibalu.

Argentinski majstor je nosio “đalorose” i najzaslužniji je za pobjedu nad Torinom – Rimljani su na “Olimpiku” slavili 3:2, Dibala je upisao het-trik.

Prvo je pogodio iz penala u prvom poluvremenu, a blistao je u nastavku nakon što je poravnao Duvan Sapata.

Majstorski je matirao Vanju Milinković-Savića u 58. minutu sa 25 metara, a onda u 69. na pas Romelua Lukakua lansirao Romu ka pobjedi. Toro je u 89. ublažio poraz preko Samuelea Rićija.

Tim Danijelea de Rosija je šesti na tabeli Serije A, ima 44 boda, četiri manje od Bolonje koja je u zoni Lige šampiona.

Drugi rimski klub, Lacio, izgubio je u Firenci i doživio 10. poraz u šampionatu ove sezone.

“Viola” je slavila nakon preokreta 2:1, mada je dominirala svih 90 minuta.

Prednost gostima je u 45. minutu donio Luis Alberto, poravnao je Mihael Kajode, a konačan rezultat je postavio Đakomo Bonaventura.

Nekoliko minuta prije pogotka za 2:1 domaćin je promašio penal (Niko Gonsales je pogodio stativu).

Za Lacio je na terenu u prvom poluvremenu bio Adam Marušić.