Francuska se oprostila od Širaka uz vojne počasti
Francuska se danas uz vojne počasti na nacionalni dan žalosti oprostila od svog pokojnog bivšeg predsjednnika Žaka Širaka čijim sjenima su se poklonile i desetine sadašnjih i bivših svjetskih lidera, okupljenih u Parizu.
Domaćin svečanosti kod Napoleonove grobnice u dvorištu Palate invalida bio je aktuelni predsjednik Emanuel Makron. Vojni orkestar je odsvirao državnu himnu „Marsljezu“, a Makron obavio smotru garde.
Širakov kovčeg, prekriven francuskom trobojkom, donijet je potom u sredinu kaldrmisanog dvorišta.
Makron, koji nije govorio, kasnije je prisustvovao završnoj službi u crkvi Sen Sulpis, u centru Pariza, zajedno s članovima Širakove porodice, francuskim političarima i stranim zvaničnicima, uključujući ruskog predsjednika Vladimira Putina, bivšeg američkog predsjednika Bila Klinton i kralja Jordana Abdulaha Drugog.
Britanska kraljica Elizabeta Druga (93) nije doputovala u glavni grad Francuske, već je uputila saučešće porodici Širak i „narodu Francuske“.
Kada je, po francuskom običaju – pozdravljen aplauzom, kovčeg s telom Širakova donijet u Sen Sulpis, pijanista Daniel Barenboam odsvirao je Šubertov „Emprompti“, dok su ožalošćeni i zvanice išli u špalirima s obije strane puta pogrebne povorke.
Privatna porodična crkvena služba obavljena je se prije vojnih počasti, a privatna sahrana kasnije, na groblju Monparnas.
U školama i javnim službama Francuske održan je minut ćutanja. Hiljadama kilometara od Pariza, minutu ćutanja su se pridružili i francuski ragbi igrači na Svjetskom kupu u Japanu.
Širak je bio jedan od glavnih „stubova“ francuske politike četiri decenije, gradonačelnik Pariza, poslanik, premijer i predsjednik Francuske od 1995. do 2007.
Kao posljednji francuski šef države koji je imao dva mandata, Širak je umro prošle nedjelje u 86. godini.
Poznat po tome što je podržavao osjećaj nacije o njenoj veličini i suprotstavio se američkoj invaziji na Irak 2003. Širaka se građani sjećaju uprkos njegovim političkim neuspjesima i presudi zbog korupcije iz 2011. zbog delikata tokom gotovo dvije decenije koliko je bio gradonačelnik Pariza.