Italijanska glumačka diva Đina Lolobriđida umrla je u 95. godini, javili su danas svjetski mediji. Đina se proslavila pedesetih godina prošlog vijeka kao mediteranski seks-simbol i glumica, a kad se povukla iz svijeta filma postala je fotograf i skulptor.
Rođena 1927. u skromnoj porodici u malom selu Subiaco u planinskoj regiji Abruco u središnjoj Italiji, posle završetka rata, Đina je odlučila da nastavi školovanje. Dobila je skromnu stipendiju i 1945. je upisala Akademiju likovnih umjetnosti u Rimu. Bavila se i modelingom, 1947. prijavila se za takmičenje Mis Italije na kome je osvojila treće mjesto. Osim lente, dobila je i filmske uloge. Igrala je sa najvećim svjetskim glumcima, od Francka Sinatre, Šona Konerija, Marsela Mastroanija do Hemfrija Bogarta.
Sofija kao konkurencija
Mediji su Sofiju Loren i Đinu Lolobriđidu često poredili i smatrali ih za konkurenciju.
„Nisam gledala na to kao na rivalstvo. Ja sam bila broj jedan. Uspjela sam isključivo zbog sebe, bez producenata koji su me podržavali. Sve sam učinila sama”, govorila je svojevremeno Đina.
Nakon uspješne karijere u Holivudu vratila se u Italiju i tek se povremeno pojavljivala na filmu i televiziji.
Vratila se svojim prvim umjetničkim ljubavima, fotografiji i skulpturi.
Privatni život
Na dočeku 1947. godine Đina je upoznala Milka Škofiča, mladog slovenačkog ljekara. Vjenčali su se i dvije godine kasnije dobili sina. On je napustio medicinu i bio je njen menadžer, a brak je trajao do 1971. godine.
Sa 79 godine, 2006. najavila je veridbu s četrdesetpetogodišnjim španskim biznismenom Havierom Rigauom. Ipak, nekoliko mjeseci kasnije raskinula je uz objašnjenje da su mediji previše zadirali u njen život.
Godine 2010. skandal oko njihove veze dobio je obrt, piše Indeks. Tvrdila je da je Havijer lažirao njihov brak da bi preuzeo njeno imanje. Na kraju se ispostavilo da je ipak lagao.
(Politika.rs)
