Američki košarkaš Šejn Larkin otkrio je razloge odluke da iz Efesa pređe u Fenerbahče.
– Razlog nije bio novac. Da sam to želio, mogao sam da odem negdje drugo i zarađujem 10, 12, pa čak i 15 miliona dolara. Mogao sam da kupim Ferari i svakog dana dolazim njime na trening. Želim da me pamte kao jednog od najvećih igrača svih vremena – zapravo, želim da budem najveći koji je ikada igrao. Ali još je bilo nekoliko stvari koje su mi nedostajale da to ostvarim – rekao je Larkin.
Razočaran je tretmanom u Efesu.
– Poštujem sve. Ja sam vojnik. Koga god mi date, ići ću s njim u rat. Ali rečeno mi je da ću biti igrač broj jedan u ovom timu, a onda mi je odjednom tlo izmaknuto pod nogama. Na kraju sam završio na dnu – rekao je američki plej.
Bilo je problema u komunikaciji.
– Kažu vam: „Ovog igrača ne smijemo da izgubimo“, a onda ga izgubite. Zatim kažu: „Ni ovog ne smijemo da izgubimo“, pa i njega izgubite. Naravno da je to frustrirajuće. Kažete im „A“, a oni urade „B“ – ispričao je Larkin.
