Razgovor sa predsjednikom Vlade Milojkom Spajićem bio je sadržajan, otvoren i konstruktivan, izjavio je za RTCG šef poslaničkog kluba Demokrata Boris Bogdanović.
„Iako Klub poslanika još nije formalno raspravljao o samom Sporazumu, uvjeren sam da će stav biti jedinstven u smjeru snažne podrške Sporazumu sa UAE“, rekao je Bogdanović.
Crna Gora, kako je naveo, danas ne traži bilo kakve investicije, ona vapi za onima koje su dugoročno održive, strateški promišljene i vrijednosno usklađene sa onim što želimo da postanemo.
„I vjerujem da je ova inicijativa upravo takva. Pozdravljamo što je čitav proces vođen principima inkluzivnosti, jer samo ono što je pred očima građana, i u rukama njihovih legitimnih predstavnika, predsjednika opština, odbornika i poslanika, može biti temelj nove razvojne politike, a ne još jedan primjer propuštene šanse“, rekao je Bogdanović.
