Kristijano Ronaldo očigledno ne može bez skandala. Poslije Mančester junajteda počeo je da ih pravi i u reprezentaciji Portugala.
Jedan od najboljih igrača svijeta u 21. vijeku propustio je trening „navigator“ na kojem su radili igrači koji u meču osmine finala protiv Švajcarske nisu bili u početnoj postavi. Umjesto toga, CR7 je insistirao na tome da odmah krene sa vježbama u teretani, kao i svi ostali prvotimci.
Portugal je juče sa 6:1 deklasirao Švajcarsku, a Ronaldo je većinu utakmice odgledao sa klupe. Umjesto njega u špicu napada utakmicu počeo 21-godišnji Gonzalo Ramos, koji je postigao tri i namjestio jedan gol.
Kako piše „Marka”, Ronaldu se nije svidjelo što je dobio tek nešto manje od 20 minuta u toj utakmici pa je zbog toga protestvovao odmah poslije utakmice, kada je prvi napustio teren i umjesto da slavi sa saigračima, otišao u svlačionicu.
Isti medij navodi kako su Ronaldovi saigrači bili šokirani kad su vidjeli da se Ronaldo oglušio na već uhodan program treninga i odlučio da trenira sa prvom ekipom. Nije poznato kako je na to reagovao selektor Fernando Santoš.
(sk)
